ZORAM TODAY| Aizawl 3rd June 2024 (Mon): Vawiin khan Khawzawl Bawrhsap Pu K. Lalrohlua  pisaah Khawzawl Tuisenphai Check Gate chungchang ngaihtuahin thut khawm neih a ni a. He hunah hian Khawzawl SP Pu Lalchhuanthanga, Addl DC Pu Lalfakzuala leh sawrkar official-te bakah District VC leh tlawmngai pawl hrang hrang hruaitute an tel a ni.

Sorkar thuchuahin a tarlan danin, he hun kaihruaitu DC K. Lalrohlua chuan kalkhawmte hnenah Tuisenphai Check Gate siam leh kalpui a lo nih tawh dan hrang hrang te a sawi fiah a. Covid hripui, kuhva ro tawlh ruk leh African Swine Fever (ASF) hri leng te venna turin October ni 6, 2020 khan Home Department atangin Khawzawl Tuisenphaiah ‘Temporary Check Gate’ din tura phalna hmuh a nih thu a tarlang. Tuisenphai Check Gate chu ‘Temporary Check Gate’ a nih angin a enkawl zui leh kalpui zel dan tur ngaihtuah a tul a ni tiin Bawrhsap hian kalkhawmte chu an ngaihdan sawi ho turin a sawm a ni.

Khawzawl SP Pu Lalchhuanthanga pawhin thu sawiin, Check Gate kalpui dan report a pe a. Tuisenphai Check Gate chu dan lova kuhva tawlh ruk venna kawnga Mizoram sawrkarin Check Gate pathum (Kanhmun, Sairang Sihhmui  leh Khawzawl) a siam zinga mi a ni, a ti a. Check Gate enkawlna kawnga Khawzawl District Executive Force hmalakna leh harsatna tawh hrang hrang te a sawi bawk.

Vawiina kalkhawm sawrkar official leh khawtlang hruaitute hian Khawzawl Tuisenphai Check Gate chu sualna tih tim leh tih tlemna kawngah a tangkai hle tih an sawi a. Check Gate chu mipuite pawhin an thlamuanpui a, Check Gate CCTV nena thuam thlap a awm avang hian dan lo anga thil tawlh ruk tum ten gate an helna lamah Police-te tan pawn chan khan hriat a awlsam phah hle a ni, an ti. Khawzawl Police te hian tun inrinni (June ni 1, 2024) zing khan Sialhawkah Truck pasarih atangin kuhva ro bag 1150, cheng nuai  186 (1,86,87,500) man hu an man a, he mi zan vek hian truck pathum atangin kuhva ro bag 370, cheng nuai 74 man hu an man bawk.  May ni 21 khan Khawzawl Chhumliamkawnah truck pasarih atangin kuhva ro bag 857, cheng nuai 171.4 man hu an lo man tawh bawk a ni.

Vawiin thutkhawm hian Khawzawl Tuisenphai Check Gate chu Khawzawl District Executive Force (SP) in lo enkawl zui rih phawt se, changtlung zawk leh mumal zawka a kal theih nan hmalak chhoh zel ni se tiin an rel a ni.